معرفة تفصيلية كاملة عن الكوبلن

يعني إيه كوبلن ؟
الكوبلن أو coupling من اسمه يعني حاجة couple .. حاجة ثنائية أو مجوز أو بتتكون من قطعتين بيتحركوا مع بعض

إيه مكونات الكوبلن ؟؟
الكوبلن بيتكون من ماسورة أو عمود حديد ماشي من الفتيس لحد العجل .. و الماسورة دي في وسطها علبة محاطة بكاوتش مرن شبه السوستة ( أو شبه الأكورديون )
العلبة دي بقي بتكون فيها دايرة حديد حواليها بلي ( عشان الدايرة دي بتلف مع العلبة ) .. و الدايرة دي مجوفة شبه الكوباية بيطلع منها باقي العمود الحديد لحد العلبة اللي بعدها
يعني باختصار العمود الحديد بتاع الكوبلن مش حتة واحدة .. دول ٣ حتت
كل حتة اخرها علبة جواها كوباية بيبات فيها الحتة اللي بعدها و هكذا
الكوباية اللي جوة العلبة اسمها راس الكوبلن

طيب ازاي الكوبلن بيشتغل ؟؟
خلينا متفقين ان فيه موتور بيحرق بنزين و بيلف .. و فيه فتيس بيلف مع الموتور .. الفتيس دة بقي .. طالع منه ماسورة يمين ( الكوبلن اليمين )  و ماسورة شمال ( الكوبلن الشمال )  .. و كل ماسورة او كوبلن رايح لعجلة .. فلما الفتيس يلف الكوبلن يقوم الكوبلن يلف العجل و العربية تتحرك

و ليه لازم نستخدم كوبلن في العربية ؟؟
لأن الموتور و الفتيس في نص العربية .. و العجل في الجناب .. فلازم حاجة تنقل حركة الفتيس اللي في نص العربية للعجل اللي علي الاطراف .. فلازم نستخدم عمود او ماسورة طويلة توصل للعجل

طيب نيجي لأخطر سؤال في الموضوع : ليه العمود دة لازم يكون علي ٣ حتت و بينهم علب فيها بلي و كوبايات و حواليهم كاوتش ؟؟ .. يعني ليه مايكونش حتة واحدة من الفتيس للعجل و خلصنا ؟؟؟

هاقول لحضرتك .. دلوقت الحركة من اول ما تطلع من الموتور للعجل لازم تعدي علي أكتر من وسيط

الوسيط الاول هو طقم الدبرياج اللي بيفصل بين الموتور و الفتيس .. ووظيفته يفصل الحركة من الموتور للفتيس عشان حضرتك تختار الغيار المناسب او السرعة المناسبة
بعدين الوسيط التاني هو الفتيس نفسه اللي بيديك امكانية انك تختار الغيار المناسب للسرعة بتاعتك
بعدهم ييجي الوسيط التالت اللي بياخد الحركة من الفتيس و يوديها للعجل وهو الكوبلن
المشكلة بقي ان الفتيس متشعبط في نص العربية لفوق في مستوي عالي .. و العجل علي الارض في مستوي واطي .. و بالتالي الكوبلن ماشي من الفتيس للعجل مايل لتحت .. مش خط مستقيم
يبقي ازاي العمود دة رابط بين حاجتين بيلفوا ( الفتيس و العجل ) و فيهم حاجة واطية و حاجة عالية  .. دة غير ان العجل طول ماهو ماشي بياكل مطبات و بيطلع و ينزل فوق و تحت و هو بيلف لقدام برضه
طب بلاش دي .. علي فرض اننا قدرنا نخلي الفتيس ف نفس ارتفاع العجل و نخلي الكوبلن ماشي مستقيم .. المفروض ان الفتيس بيلف و عمود الكوبلن طالع منه و بيلف معاه عشان يلف العجل لقدام .. طيب ماهو العجل دة وهو بيلف لقدام مطلوب منه يحود يمين وشمال عشان نقدر نوجه العربية .. يبقي ازاي العمود دة وهو بيلف لقدام نكسر منه حتة نخليها تحود يمين و شمال و تفضل تلف لقدام برضه ؟؟؟

هنا بقي ييجي دور الكوباية اللي حواليها بلي .. الكوباية دي بقي ( احنا اتفقنا انها بتلف مع العلبة ) جواها بلي يديها امكانية تروح و تيجي في كل الاتجاهات .. فوق و تحت .. يمين و شمال عشان تدي امكانية لباقي العمود اللي طالع منها انه يروح في كل الاتجاهات وهو لسة بيلف لقدام عشان يحرك العربية لقدام

انا عارف ان الموضوع محتاج شوية تخيل .. بس استحملوني 😅😅😅

تخيل مثلا زرار المرايات الكهربا .. ازاي الزرار دة بيلف يمين و شمال عشان يختار المرايا .. و هو نفسه يروح في كل الاتجاهات عشان يظبط المراية

نفس القصة في دراع البلايستيشن .. ال joystick  اللي بيروح في كل الاتجاهات بالرغم من انه صباع ثابت ؟؟ .. كلها تطبيق لفكرة الكوبلن

حاجة بتلف حوالين نفسها و مطلوب مننا نوجهها فوق و تحت و يمين و شمال و تفضل برضه تلف حوالين نفسها

عشان كدة عندنا كوبلن خارجي ( العلبة الاقرب للعجل ) عشان تخلي العجل و هو بيلف لقدام قادر انه يحود يمين و شمال

و كوبلن داخلي ( العلبة الاقرب للفتيس ) عشان تخلي العمود الحديد وهو طالع من الفتيس نازل للعجل بميل لتحت .. و يطلع و ينزل مع العجل في المطبات و النقر و هو لسة بيلف لقدام عشان يحرك العربية

طيب هل وظيفة العلب اللي في نص العمود انها بس تدي حرية حركة للحتت ال ٣ بتوع العمود ؟؟
في الواقع لها وظيفة تانية مهمة جداً  .. الا و هي انها تمتص اي حمل زيادة و تحمي الفتيس

إزاي الكلام دة ؟؟؟
دلوقت لو فرضنا ان عمود الكوبلن دة حتة واحدة مفيش علب و بيلف لقدام عشان يحرك العجل لقدام .. و لأي سبب من الاسباب العجلة دي قفشت فجأة
الطبيعي ان العمود هايقف فجأة برضه لانه بيلف مع العجل .. و بالتالي برضه الفتيس هايقفش فجأة .. و دة ممكن يكسر التروس اللي جوة الفتيس

قالك لأ .. في حالة القفش او ال overload العلب و الكوبايات دي تتكسر و تفصل حركة الفتيس عن العجل عشان نحمي الفتيس و يبقي الاسهل و الارخص اننا نغير الكوبلن .. و دة اللي بيحصل لما الصنايعي يقولك ( الكوبلن فرط )

طيب بما اننا عرفنا التركيب و كيفية العمل فا يبقي سهل اننا نتنبأ بالاعطال اللي ممكن تحصل في الكوبلن :

اولا .. الكوبايات و البلي دي اجزاء متحركة .. و بالتالي لازم يكون وسطها شحم يلين حركتها .. فلازم نغطي الكلام دة بكاوتش مرن يتحرك مع حركة الكوبلن يمين و شمال و فوق و تحت .. فلو الكاوتشة دي اتقطعت بتسرب الشحم اللي جواها و بالتالي حركة الاجزاء دي هاتبقي اصعب و فيها احتكاك جامد و هاتتاكل .. و تبدأ بقي تسمع صوت الطقطقة في الملفات .. دة معناه ان الكوبلن الخارجي فيه مشكلة لانه هو اللي بيلف يمين و شمال .. فصوته بيظهر في الملفات

ثانيا .. الكوبلن زي اي جزء في العربية بعد فترة طويلة مع الاستخدام بيبدأ يضعف حتي لو فيه شحم .. و العيب بيظهر مع اقصي عزم للعربية لأنه بيعمل اكبر حمل علي الكوبلن
و بما ان عربياتنا الرينو اقصي عزم لها بيطلع عند rpm ٢.٥-٣  .. يبقي لو الكوبلن الداخلي فيه مشكلة .. هاتلاقي ارضية العربية بترقص عند سرعة معينة و الرجة تروح بعد السرعة دي
يعني مثلا الهزة تحصل عند سرعة ٧٠-٨٠ .. دة لان اقصي عزم للغيار التالت عند rpm ٣ بتكون العربية في السرعات دي .. بعدها انت بتدي الغيار الرابع فالعزم يقل و يبدأ يزيد تاني لحد ما يوصل لسرعة ٩٠-١٠٠ اللي هو اكبر عزم برضه و هنا تحصل الهزة و تروح بعد ١٠٠
باختصار لو ارضية العربية بتتهز في سرعة معينة و بعد كدة تروح علي سرعات اعلي يبقي فيه مشكلة في الكوبلن الداخلي .. و بتحس بهزة ارضية العربية لان الكوبلن الداخلي بيكون اقرب للفتيس تحت رجلك

طيب ازاي نحافظ علي الكبالن بتاعت عربياتنا ؟؟

اهم حاجة علي الاطلاق بلاش فرك و طلعات امريكاني بالعربية .. لانك بتدي للعربية عزم جامد جدا فجأة .. و دة يفرم البلي و الكوبايات بتاعت الكبالن .. رفقاً بالكوبايات يا محترمين

تاني اهم حاجة انك لو تخيلت المنظومة دي و هي شغالة هاتلاقي انك بتلف العجل لقدام و كمان بتكسر يمين و شمال و دي حاجة مش سهلة .. فبلاش نبقي واخدين ملف بسرعة و نكبس بنزين تاني

تالت اهم حاجة .. نفحص كاوتش الكبالن اثناء الصيانات .. نشوفه سليم ولا مقطوع و مسرب شحم .. عشان نغير الكاوتش و نحط شحم
#ممدوح_بتاع_الزوايا #ضبط_زوايا #سيارات #ترصيص